|
Прочытайте реляцию і обізрийте знимкы з червцьовой візыты украіньской делеґациі рильных продуцентив і осиб звязаных з льокальным самоурядом з Винничыны на Украіні в ґорлицкым повіті за мотузком.
Proczytajte relacyju i obizryjte znymky z czervcovoj vizyty ukrainskoj delegacyi rylnych producentyv i osyb zviazanych z lokalnym samouriadom z Vynnyczyny na Ukraini v gorlyckym poviti za motuzkom.
Текст і фото: Анна Коцур
На запрошыня Льокальной Ґрупы Діяня „Бескід Ґорлицкій” в днях 20-21 червця ґорлицкій повіт одвиділа 25 особова делеґация рильных продуцентив і осиб звязаных з льокальным самоурядом з терену Винничыны на Украіні. Цільом іх візиты было вказаня украіньскым представником діянь „Бескіду Ґорлицкого” на поли твориня стратеґіі вспертя і промоциі реґіональных продуктив і аґротуристычной діяльности веденой в повіті, а і посередньо промоция лемківской і поґужаньской культуры.
Украіньскы госьці одвиділи Центрум Культуры і Промоциі в Бобові, де озерали выставу кльоцковой коронкы. Пізніжше заіхали на смачний обід до пенсйонату „Анна” в Стружувці ведену през Анну і Штефана Тацинив. Пані Анна оповіла о початках своєй діяльности і што найбарже цєкавило прибылых о європскых фондах, з котрых скорыстала на будову пенсйонату. Під вечер делєґация приіхала до Одерного к. Усьця Руского де мали оказию выслухати двох рефератив: Юзефа Абрама, о діянях „Бескіду Ґорлицкого”, як і Роберта Лентовскєґо, на тему продукту туристычного пн. „Зелений Бескід – Маґічна Краіна Лемків і Поґужан”. Госьці мали тіж оказию до стричы з ремесльниками, котры творят трдыцийны лемківскы і поґужаньскы продукты. Были то Петро Вєцко з Білянкы, Штефан Романик з Новици і Моніка Мадей з Бобовой, котры презентували: выриб ґонтив, лыжок і кльоцковой коронкы. На закінчыня вечер украсила зо своім лемківскым репертуаром Юлия Дошна з Лоси при акомпаняменті гармоніі і баса Яна і Дарюша Малішы з Менціны, котры в тым складі заграли перший раз.
Другого дня по шніданю госці звиджали грекокатолицку церков пп. Сьв. Параскєвы в Квятони. Дальше звиджали Стадніну Гуцульскых Коніі „Ґладишів” в Реґєтові де прібували молочных продуктив вытваряных в стаднініі. Потім з великым клопотом іхаючы през деревяны, нарушены підчас повони мосты, обіздом през Фльоринку, госці дотерли до Баниці коло Ізб. В Баниці одвиділи екольоґічну аґроґаздівку Маріі і Збіґнєва Опаля „Опалувка”. Опроваджаны по выділеных загорідках де росне блиско 400 ґатунків рослин, в тым парунадцет зіль, частуваны специяламы ґаздиніі учасникы выміняли своі спостережыня. Під конец візиты учасникы іщы коротко пізрили на грекокатолицку церков пп. Космы і Дамяна і вернули до Ґорлиц, а далі дорогом до Улянова на Підкарпацю.
Візита в ґорлицкым повіті тирлава пітора дня і была частыном тыжньового бытя украіньской ґрупы в Польщы. Делеґациі товаришыла Винницка Державна Телевізия, котра реєструвала візыту. Ініцъятива реалізувана была в рамах проєкту „Розвій і промоция традыцийных продуктив Винничыны” кєруваного през Фундацию Проґрамів Вспертя для Рільництва ФАПА з Варшавы. Проєкт співфінансуваний был з середків польского Міністерства Закордонних Справ.
Знимкы з візыты!!!
Na zaproszynia Lokalnoj Grupy Dijania „Beskid Gorlyckij” v dniach 20-21 czervcia gorlyckij povit odvydila 25 osobova delegacyja rylnych producentyv i osyb zviazanych z lokalnym samouriadom z terenu Vynnyczyny na Ukraini. Cilom ich vizyty bylo vkazania ukrainskym predstavnykom dijan „Beskidu Gorlyckoho” na poly tvorynia strategii vspertia i promocyi regionalnych produktyv i agroturystycznoj dijalnosty vedenoj v poviti, a i poseredno promocyja lemkivskoj i pogorzanskoj kultury.
Ukrainsky hosci odvydily Centrum Kultury i Promocyi v Bobovi, de ozeraly vystavu klockovoj koronky. Pizniz’sze zaichaly na smacznyj obid do pensjonatu „Anna” v Struz’ovci vedenu prez Annu i Sztefana Tacynyv. Pani Anna opovila o poczatkach svojej dijalnosty i szto najbarz’e ciekavylo prybylych o jevropskych fondach, z kotrych skorystala na budovu pensjonatu. Pid veczer delegacyja pryichala do Odernoho k. Uscia Ruskoho de maly okazyju vysluchaty dvoch referatyv: Jozefa Abrama, o dijaniach „Beskidu Gorlyckoho”, jak i Roberta Lentovskiego, na temu produktu turystycznoho pn. „Zelenyj Beskid – Magiczna Kraina Lemkiv i Pogorzan”. Hosci maly tiz’ okazyju do stryczy z remeslnykamy, kotry tvoriat trdycyjny lemkivsky i pogorzansky produkty. Byly to Petro Viecko z Bilanky, Sztefan Romanyk z Novycy i Monika Madej z Bobovoj, kotry prezentuvaly: vyryb gontyv, lyz’ok i klockovoj koronky. Na zakinczynia veczer ukrasyla zo svoim lemkivskym repertuarom Julyja Doszna z Losy pry akompaniamenti harmonii i basa Jana i Dariusza Maliszy z Menciny, kotry v tym skladi zahraly perszyj raz.
Druhoho dnia po sznidaniu hosci zvydz’aly hrekokatolycku cerkov pp. Sv. Paraskievy v Kviatony. Dalsze zvydz’aly Stadninu Huculskych Konii „Gladysziv” v Regietovi de pribuvaly molocznych produktyv vytvarianych v stadninii. Potim z velykym klopotom ichajuczy prez dereviany, naruszeny pidczas povony mosty, obizdom prez Florynku, hosci doterly do Banyci kolo Izb. V Banyci odvydily ekologicznu agrogazdivku Marii i Zbignieva Opala „Opaluvka”. Oprovadz’any po vydilenych zahoridkach de rosne blysko 400 gatunkiv roslyn, v tym parunadcet zil, czastuvany specyjalamy gazdynii uczasnyky vyminialy svoi sposterez’ynia. Pid konec vizyty uczasnyky iszczy korotko pizryly na hrekokatolycku cerkov pp. Kosmy i Damiana i vernyly do Gorlyc, a dali dorohom do Ulanova na Pidkarpaciu.
Vizyta v gorlyckym poviti tyrlava pitora dnia i byla czastynom tyz’novoho bytia ukrainskoj grupy v Polszczy. Delegacyi tovaryszyla Vynnycka Derz'avna Televizyja, kotra rejestruvala vizytu. Inicjatyva realizuvana byla v ramach projektu „Rozvij i promocyja tradycyjnych produktyv Vynnyczyny” kieruvanoho prez Fundacyju Programiv Vspertia dla Rilnyctva FAPA z Varszavy. Projekt spivfinansuvanyj byl z seredkiv polskoho Ministerstva Zakordonnych Sprav.
Znymky z vizyty!!! Only registered users can write comments.
Please login or register. Powered by AkoComment 1.0 beta 2! |
Хыжа
Культура
Школа языка
Бесіда
Нашы люде
- - - - - - - - - -
До стягніня
Мотузкы
Напиш до нас
_DATE_FORMAT_LC
